İranın BMT-dəki səfiri və daimi nümayəndəsi Əmir Səid İrəvaninin məktubunda deyilir: İran İslam Respublikası bir daha bu əsassız ittihamları ciddilik və qətiyyətlə rədd edir. İran bu cür ittihamları Amerika Birləşmiş Ştatlarının siyasi gündəminin bir hissəsi hesab edir və onun məqsədi sözügedən ölkənin Yəmənin suverenliyi və ərazi bütövlüyünə qarşı hazırkı təcavüzkar hərəkətlərini ört-basdır etmək və qanuniləşdirməkdir. Üstəlik, indi həmişəkindən daha aydındır ki, Birləşmiş Ştatlar BMT ekspertlərinə onların missiyasının müstəqilliyinə xələl gətirmək üçün təzyiq göstərmək istəyir.
İranın BMT-dəki səfiri deyib: İran İslam Respublikası bir neçə dəfə, o cümlədən 19 iyun 2024-cü il tarixli məktubda açıq şəkildə bəyan edib ki, o, Təhlükəsizlik Şurasının müvafiq qətnamələrinə zidd fəaliyyətlərdə iştirak etməyib. İranın Yəmən böhranı ilə bağlı siyasəti şəffaf və sabitdir.
İrəvani vurğuladı: İran Yəmən böhranının diplomatik kanallar vasitəsilə sülh yolu ilə həllini dəstəkləyir və dəniz təhlükəsizliyi və gəmiçiliyin azadlığına sadiqliyini vurğulayır. Lakin reallıq budur ki, ABŞ və onun tərəfdaşları Yəmənin suverenliyi və ərazi bütövlüyünə qarşı təcavüz aktları törətməklə beynəlxalq hüququn, BMT Nizamnaməsinin və Təhlükəsizlik Şurasının qətnamələrinin kobud şəkildə pozulmasına görə məsuliyyət daşıyırlar.