Fələstin İslami Cihad və HƏMAS hərəkatlarının liderləri Təl-Əvivlə hər hansı razılığa gəlmək üçün sionist rejim ordusunun Qəzzə zolağından tamamilə çıxarılmasını tələb ediblər.
HƏMAS Məşvərət Şurasının sədri Məhəmməd Dərviş İslami Cihad Hərəkatının Baş katibi Ziyad əl-Naxalə və onun müavini Məhəmməd Əl-Hindi ilə görüşdən sonra birgə bəyanat yayıblar.
Bəyanatda vurğulanır: “Təl-Əvivlə hər hansı razılığa gəlmək üçün İsrail ordusunun bütün Qəzzə zolağından tam çıxarılması, ərazinin yenidən qurulmasına başlanması, əsirlərin mübadiləsinə dair razılaşma və blokadaya son qoyulması zəruridir.”
“Anadolu”nun bildirdiyinə görə, bu ortaq bəyanatda həmçinin "sionist rejimin Qəzzəyə qarşı hücumlarının dayandırılması və bu rejimin insanlıq əleyhinə cinayətlər törətmiş rəhbərlərinin cəzalandırılması" vacibliyi qeyd olunub.
HƏMAS və İslami Cihad liderləri birgə bəyanatlarında Təl-Əvivin vasitəçilərin səylərini məğlubiyyətə uğratmaq yanaşmasını tənqid edib və bəyan ediblər: “İsrail hücumların davam etdirilməsində israr etməklə və əvvəlki mərhələlərdə atılan addımları, xüsusən də hərəkatın 2 iyul təklifini rədd edərək vasitəçilərin səylərinin uğursuzluğuna görə məsuliyyət daşıyır.”