Doktor Məsud Pezeşkiyan Üçüncü Xəzər İqtisadi İclası toplantısında iştirak etmək üçün Tehrana səfər edən Azərbaycan Respublikasının Baş naziri cənab Əli Əsədov ilə görüşdə iki ölkə arasındakı münasibətləri qardaşlıq, dini və qohumluq əlaqələri üzərində qurulmuş münasibətlər kimi qiymətləndirərək deyib: “Hesab edirik ki, siyasi sərhədlər iki ölkə və iki xalq arasında dərin münasibətlərdə və bağlarda məhdudiyyətlər yarada bilməz və biz Azərbaycan Respublikası ilə bütün sahələrdə əlaqələri və qarşılıqlı əməkdaşlıqları genişləndirməkdə maraqlıyıq.”
Prezident Xəzər İqtisadi İclasını qarşılıqlı iqtisadi, elmi, mədəni əlaqələrin və əməkdaşlığın dərinləşdirilməsi və inkişafı üçün münasib fürsət hesab edərək deyib: “Xəzəryanı ölkələr də bu sammitlər kontekstində anlaşmaya, empatiyaya və ümumi məsələlərin idarə olunmasına nail ola bilərlər və biz bu imkandan maksimum istifadə etməliyik.”
Görüşdə Azərbaycan Respublikasının Baş naziri cənab Əli Əsədov ölkə Prezidenti cənab Əliyevin səmimi salamlarını doktor Pezeşkiyana çatdırıb, qonaqpərvərliyə və bu iclasın uğurla keçirilməsinə görə minnətdarlığını bildirib, iki ölkə arasında münasibətlərin çox yaxşı səviyyədə olduğunu qeyd edərək deyib: “Azərbaycan hökuməti İran İslam Respublikası ilə hərtərəfli əlaqələri inkişaf etdirmək əzmindədir. Biz iki ölkə arasında əldə olunmuş razılaşmaları dəstəkləməyə və həyata keçirməyə hazırıq.”
Azərbaycan Respublikasının Baş naziri İran və Azərbaycan arasında xüsusilə son aylarda diplomatik nümayəndə heyətlərinin qarşılıqlı səfərlərini əlaqələrin yüksək səviyyədə olması və iki ölkənin yüksək səviyyəli rəsmilərinin qarşılıqlı əlaqələrin genişləndirilməsi istiqamətində ciddi əzminin əlaməti hesab edib, Azərbaycan Prezidentinin doktor Pezeşkiyanı bu ölkəyə səfərə dəvətini təkrarlayaraq bildirib: “Sizin səfəriniz, şübhəsiz ki, Azərbaycan hökuməti və xalqı üçün çox sevindirici olacaqdır.”
Əli Əsədov həmçinin İran İslam Respublikasının nailiyyətlər və imkanlar sərgisini ziyarət etməsinə toxunaraq əlavə edib: “Bu gün biz İranın xüsusilə tibb və səhiyyə sahələrindəki bacarıqları və irəliləyişləri haqqında həqiqətən də öyrəndik və bu sahədə təcrübə mübadiləsində maraqlıyıq.”