Əmir Abdullahian: İran və Azərbaycan Respublikası arasında münasibətlərdə yeni səhifə açılıb

Bu görüşdə Əmir Abdullahiyan azərbaycanlı həmkarı ilə görüşməkdən məmnunluq ifadə edərək deyib: “Azərbaycan Respublikası İranın qonşuluq siyasətində mühüm mövqeyə malikdir və iki xalqın qonşuluq və tarixi bağların fövqündə olan qohumluq əlaqələri var.”

Xarici İşlər naziri Azərbaycan Respublikasının bütün ərazilərində Prezident seçkilərinin keçirilməsi münasibətilə bir daha təbriklərini çatdıraraq, ikitərəfli münasibətlərin inkişaf prosesindən məmnunluğunu ifadə edib.

O, deyib: “Xoşbəxtlikdən iki ölkə arasında münasibətlərdə yeni səhifə açılıb. Bu, iki xalq üçün ümidvericidir və iki ölkənin qarşısında qarşılıqlı faydalı əməkdaşlıq üçün çoxlu imkanlar var.”

Əmir Abdullahiyan ölkəmizin Azərbaycan Respublikası ilə bütün sahələrdə əlaqələri inkişaf etdirmək siyasətini vurğulayaraq, İran İslam Respublikasının razılaşdırılmış tarixdə iki ölkənin müştərək komissiyasının Tehranda keçiriləcək iclasına evsahibliyi etməyə hazır olduğunu açıqlayıb.

Xarici İşlər naziri iki ölkə prezidentləri arasında əldə olunmuş razılaşma çərçivəsində razılaşdırılmış sahələrdə əməkdaşlığın uğurla inkişaf etməsindən məmnunluğunu ifadə edib.

Əmir Abdullahiyan həmçinin regional çoxtərəfli strukturların region ölkələrinin ortaq maraqları istiqamətində daha fəal olması üçün birgə səy və fəaliyyətin vacibliyini vurğulayıb.

Azərbaycanın Xarici İşlər naziri Ceyhun Bayramov bu görüşdən məmnunluğunu ifadə edərək, iranlı həmkarı ilə davamlı ikitərəfli məsləhətləşmələri faydalı və məhsuldar adlandırıb.

O, İran Prezidenti və Xarici İşlər nazirinin ölkəsinin Prezident seçkiləri ilə bağlı təbriklərini yüksək qiymətləndirərək deyib: “Ölkəmizin siyasəti qonşuları ilə imtiyazlı münasibətlərə malik olmaqdır. Bu arada İranın xüsusi mövqeyi var və Azərbaycan İranla əlaqələri inkişaf etdirmək əzmindədir.”

Ceyhun Bayramov bir sıra birgə layihələrin icrasının gedişatına toxunaraq, bu layihələrin qrafik çərçivəsində tez bir zamanda həyata keçiriləcəyi və açılışı olacağına ümidvar olduğunu bildirib.

O, həmçinin iki ölkə arasında nəqliyyat və tranzit əməkdaşlığının vacibliyini qeyd edib və Azərbaycanın Şimal-Cənub tranzit dəhlizində əməkdaşlığı gücləndirməyə hazır olduğunu vurğulayıb.

Azərbaycan Respublikasının Xarici İşlər naziri iki ölkə arasında iqtisadi əməkdaşlıq üzrə birgə komissiyanın iş prosesindən məmnunluğunu ifadə edib, onun ikitərəfli münasibətlərin inkişafındakı rolunu vurğulayaraq növbəti görüşün Tehranda uğurla keçiriləcəyinə ümid etdiyini bildirib.

Tərəflər müxtəlif ikitərəfli, regional və Fələstin məsələlərini müzakirə edib və fikir mübadiləsi aparıblar.