Təhdidlərin öhdəsindən gəlmək üçün Tehranla İrəvan arasında hərbi sənəd imzalamaq lazımdır

Ermənistan parlamentinin nümayəndəsi İRNA ilə bu eksklüziv müsahibəsində deyib: Ermənistan bu gün müharibə vəziyyətindədir və bu vəziyyət Ermənistan ətrafında hər gün daha da şiddətlənir. İranın Ermənistanın ərazi bütövlüyünü qoruyub saxlaması ilə bağlı bir neçə dəfə bəyanatlar verməsi ilə yanaşı, iki ölkə arasında münasibətlər hələ də çox yüksək inkişaf potensialına malikdir. Hazırda iki ölkə arasında konkret olaraq hərbi sahədə heç bir razılaşma yoxdur, belə bir hərbi sazişin bağlanması düşmənlərin təhlükəsinə nəzarət etmək və qarşısını almaq üçün zəruridir.

4 kəndin Azərbaycan Respublikasına verilməsi heç bir halda məqbul deyil. Çünki 2020-ci il müharibəsindən sonra Azərbaycan bir neçə dəfə Ermənistan ərazilərinə hücum edərək, xüsusən də İranla həmsərhəd əyalətdə bir neçə yeri ələ keçirib. 2020-ci il müharibəsindən sonra Azərbaycanın toxuna bilmədiyi yeganə yer bu yaxınlarda Azərbaycana təhvil verilən Tavuş ərazisi olub və bu ərazi Ermənistanın güclü hərbi məntəqələrindən biri hesab olunur. Bu 4 kənd Azərbaycana verilsə, Ermənistan-Gürcüstan magistral yolu Azərbaycanın, Rusiyadan Ermənistana gələn qaz xətti də birbaşa Azərbaycan qüvvələrinin nəzarətində olacaq.

Ermənistan hökuməti sərhəd məsələlərinə görə bu kəndlərin təhvil verilməsini təklif edir, lakin elə mexanizm yaradılmalı idi ki, danışıqlar xəritələr əsasında aparılsın və sonradan bu ərazilər mübadilə edilsin və ya təhvil verilsin, amma təəssüf ki, hökumət sərhəd məsələləri ilə bağlı komissiya yaratmadan torpağı təhvil verib.

Elə bu məqamda mən sizə müsahibə verəndə soydaşlarım Ermənistanın hər yerində, xüsusən də Tavuş vilayətində kütləvi etiraz aksiyaları keçirir və bir neçə gündür ki, insanlar Tavuş vilayətində mühüm yolları bağlayıb və öz etirazlarını bildirmək üçün oradan nəqliyyatın keçməsinə imkan vermirlər.

Ötən 3 il ərzində, xüsusən də 2020-ci il müharibəsindən sonra Ermənistanın hazırkı hakimiyyəti həmişə Azərbaycanın tələbləri qarşısında aciz mövqedən çıxış edib və Azərbaycan nə istəsə, ona verilib və bu 4 kəndin təhvil verilməsi də eyni istiqamətdə müəyyən edilib. Biz parlamentdə onlardan soruşanda ki, bu kəndləri təhvil vermək Azərbaycanın 2020-ci il müharibəsində işğal etdiyi torpaqlardan çıxması müqabilindədir, yoxsa bu hərəkət sülh müqaviləsinin bağlanmasına gətirib çıxaracaq, onlar cavab verirlər ki, biz heç nəyə zəmanət verə bilmərik!

Azərbaycan iki ilə yaxındır ki, 4+4 formatı deyilən bir şeydən danışır, onun birinci mərhələsi bu 4 kəndin təhvil verilməsindən ibarət olub, ondan sonra isə gözünü başqa 4 məntəqəyə dikib.

Müharibədən sonra bağlanan 9 noyabr 2020-ci il tarixli müqavilədə qeyd olunur ki, regionda kommunikasiya yolları açılsın. Orada Zəngəzur dəhlizindən heç bəhs edilməyib. Azərbaycan prezidenti etiraf edib ki, Zəngəzur dəhlizi onun Azərbaycanın siyasi ədəbiyyatına 9 noyabr müqaviləsindən sonra daxil etdiyi termindir. Ancaq indiki Ermənistan hakimiyyətinin davranışını nəzərə alsaq, şübhə edirəm ki, bununla bağlı müzakirələr aparılarsa, hökumət Azərbaycanın tələblərini əngəlləmək istəyəcək, lakin buna baxmayaraq, Ermənistan hökuməti Zəngəzur dəhlizinə istənilən şəraitdə boyun əyməyəcəyini bəyan edib.

Əminəm ki, İranın mövqeyi dəyişməyəcək.  Çünki İranın bu qırmızı xətti öz milli maraqlarından irəli gəlir, İran İslam Respublikası regionun siyasi sərhədlərinin dəyişdirilməsinin əleyhinədir və təbii ki, onu da deməliyəm ki, Ermənistan cəmiyyətinə belə təlqin edilib ki, Zəngəzur dəhlizi məsələsi yalnız İranın təzyiqi ilə dondurulub.

Avropalı müşahidəçilərin olması da bir kömək etməyib. Bu 4 kəndin təhvil verilməsi praktiki olaraq göstərdi ki, bu xarici qüvvələr heç nə edə bilməzlər və unutmayaq ki, sərhədlərdə onların əllərində olan yeganə şey dəftər, qələm və fotoaparatdır.