Xarici İşlər naziri Seyid Abbas Araqçı bu gün, çərşənbə axşamı, fevralın 25-də günortadan sonra Rusiyanın Xarici İşlər naziri Sergey Lavrovla görüşüb və danışıqlar aparıb.
Rusiya Xarici İşlər naziri Əraqçinin dəvəti ilə ikitərəfli əlaqələrin genişləndirilməsi və iki ölkə arasında hərtərəfli strateji tərəfdaşlıq sazişinin həyata keçirilməsi sahələrini müzakirə etmək məqsədi ilə Tehrana səfər edib. İran və Rusiya prezidentləri münasibətləri genişləndirmək üçün yanvarın 17-də Moskvada hərtərəfli strateji tərəfdaşlıq sazişi imzalayıblar.
İranın Rusiyadakı səfiri Kazim Cəlali bu səfərin əhəmiyyət və məqsədlərini izah edərək bildirib: “İkitərəfli, regional və beynəlxalq münasibətlərə dair müxtəlif spektrli məsələlər müzakirə olunacaq və fikir mübadiləsi aparılacaq.”
Xarici İşlər Nazirliyinin mətbuat katibi İsmayıl Bəqai də Rusiya Xarici İşlər nazirinin Tehrana səfərini İran İslam Respublikası və Rusiya Federasiyası arasında ikitərəfli əlaqələr, regional və beynəlxalq hadisələrlə bağlı davamlı məsləhətləşmələr çərçivəsində olduğunu bəyan edib.
Rusiya Xarici İşlər Nazirliyi Lavrovun Tehrana səfəri ilə eyni vaxtda, bu səfərin əhəmiyyətini vurğulayıb və bu ölkənin Xarici İşlər nazirinin Tehranda müzakirə edəcəyi mövzuları açıqlayaraq yazıb: “Tərəflərin bəzi mühüm beynəlxalq məsələlər, o cümlədən Suriya, Cənubi Qafqaz, Əfqanıstan, Yəmən, Fars körfəzi regionunda vəziyyət, Yaxın Şərq problemlərinin həlli, Xəzər dənizi ilə bağlı məsələlər, İranın nüvə proqramı üzrə Birgə Hərtərəfli Fəaliyyət Planı (JCPOA) ətrafında vəziyyətlə bağlı fikir mübadiləsi aparacaqları gözlənilir.”
Sizin rəyiniz