Məhəmməd İslami bu axşam televiziyaya müsahibəsində nüvə proqramı və Tehranın Beynəlxalq Atom Enerjisi Agentliyinin əhatəli hesabatına yanaşması ilə bağlı İran İslam Respublikasının ən mühüm fikirlərini ifadə edib.
Atom Enerjisi Təşkilatının rəhbəri uranın zənginləşdirilməsini nüvə sənayesinin əsası hesab edib və deyib: Bu məsələ İran İslam Respublikasının qırmızı xətti kimi tanınır. Heç kim iddia edə bilməz ki, İranın zənginləşdirmə hüququ yoxdur, çünki bu məsələ onun öz çərçivə və qaydalarına bağlıdır və xüsusi tələbləri var. Məsələyə aydınlıq gətirmək üçün sadə bir misal çəkim: Elektrik sənayesi qurmaq niyyətində olan ölkəyə demək olarmı ki, burada yalnız yarımstansiyaların və elektrik enerjisinin ötürülməsi şəbəkələrinin olmasına icazə verilir, lakin elektrik stansiyalarına sahib olmaq hüququ yoxdur? Bu məntiqli deyil. Nüvə sənayesində uranın zənginləşdirilməsi elektrik sənayesində elektrik stansiyası kimidir; yəni bütün prosesin əsasını təşkil edir.
Uranın zənginləşdirilməsi olmadan nüvə yanacaq dövrü olmayacağını vurğulayan İslami belə izah etdi: Yanacaq dövrü olmasa, tibb və sənaye də daxil olmaqla müxtəlif sahələrdə tədqiqat və tətbiqi fəaliyyətlərin aparılması imkanları itiriləcək.
O, uranın zənginləşdirilməsinin alternativinin olmadığını bildirərək dedi: İzotoplardan radiofarmasötiklərin istehsalı, nüvə cihaz sistemləri və detektorlar kimi müxtəlif proseslərdə istifadə etmək üçün izotopların ayrılması prosesi həyata keçirilməlidir. Bu proses uranın zənginləşdirilməsindən başlayır və bunsuz cəmiyyətə geniş xidmət göstərmək, müxtəlif nüvə məhsullarından faydalanmaq mümkün deyil. Ona görə də uranın zənginləşdirilməsi təkcə hüquq deyil, həm də nüvə texnologiyasının inkişafı və cəmiyyətə xidmət etmək üçün fundamental zərurətdir.
Sizin rəyiniz