İRNA-nın məlumatına görə, bu innovasiya fabriki 4500 kvadratmetr sahədə fəaliyyətini dayandırmış əczaçılıq şərbəti istehsal edən fabrikin yerində istifadəyə verilib.
Ölkənin bir neçə iri əczaçılıq şirkəti Prezidentin elm, texnologiya və biliyə əsaslanan iqtisadiyyat üzrə vitse-prezidentinin və Təbriz Tibb Elmləri Universitetinin dəstəyi ilə bu innovasiya fabrikində öz texnologiya inkişaf ofislərini yaradıb. Məqsəd, yenilikçi və texnoloji nüvələr tərəfindən texnologiyanın inkişafı ilə bu sənayenin problemlərinə cavab verməkdir.
Bu innovasiya fabriki çərçivəsində dəyəri təqribən 18 milyard tümən olan 16 meqalayihə müəyyən edilib ki, onlardan beşi üzrə müqavilə bağlanma mərhələsinə çatıb.
İRNA-nın məlumatına görə, Prezidentin elm, texnologiya və biliyə əsaslanan iqtisadiyyat üzrə köməkçisi şənbə günü Təbrizdə ölkənin ilk əczaçılıq innovasiya fabrikinin açılış mərasimində deyib: “Biliyə əsaslanan şirkətlər onların tədqiqat və inkişafı üçün zəmin yaranması məqsədilə geniş şəkildə dəstəklənir.”
Doktor Ruhullah Dehqani Firuzabadi bildirib ki, çox dəyərli bir səy göstərilmişdir, düzgün istifadə olunmayan bina və kompleks real məhsuldarlıqla innovasiya fabrikinə çevrilmişdir.
O, qeyd edib ki, bu fabrik ölkə gənclərinə həmin sahədə biliklərə əsaslanan şirkətlər yaratmağa imkan yaradıb və bu, çox dəyərlidir.
Firuzabadi əlavə edib: “Oxşar tədbirlər ölkənin bir sıra bölgələrində baş tutub, ancaq əczaçılıq sahəsinə diqqət yetirmək həqiqətən bir yenilik və yaxşı bir hadisədir.”
Şərqi Azərbaycan və Təbrizin maşınqayırma və əczaçılıq sənayesi sahəsindəki imkan və bacarıqlarına işarə edən vitse-prezident bu ikisinin birləşməsinin böyük işlərə start verə biləcəyini vurğulayıb.
O, əlavə edib: “Təbrizdə fəaliyyət göstərən yaxşı əczaçılıq şirkətlərinin köməyi ilə zəmanətli vergi kreditini də nəzərdən keçiririk ki, tədqiqat və inkişafa sərf etsinlər və tərəqqi yolunda addımlar atsınlar.”
Bir milyon dollarlıq dərman ixrac etmək imkanımız var
Zəhravi Əczaçılıq Şirkətinin baş direktoru da İRNA-ya açıqlamasında deyib: “Bu şirkət ölkədə transplantasiya dərmanlarının ən böyük istehsalçısıdır. Eləcə də, MS dərmanları bu şirkətin məhsullarından biridir ki, 2019-cu ildə transplantasiya xəstələri üçün istifadə edilən məhsulun istehsalına görə, bilik əsaslı olmuşdur.
Bu məhsul tez təsir edən və yan təsirləri az olan yumşaq kapsul növüdür və bu şirkət nano texnologiya ilə istehsal olunan bu məhsulun istehsalına görə biliyə əsaslanan şirkətlər siyahısına daxil edilib.”
Fərhad Kiyafər qeyd edib ki, biz inqilabdan sonra nüfuzlu İsveçrə şirkətinin lisenziyası ilə məhsul istehsal edən ilk şirkətik və 20 ildir əməkdaşlıq edirik və bu şirkətin lisenziyası ilə transplantasiya və xərçəng xəstələri üçün iki məhsul istehsal edirik. Biz həm də əvvəlcədən doldurulmuş ampulaların istehsalı sahəsində ilklərdənik, nanotexnologiya və biotexnologiya sahələrində öndə olmuşuq və biotexnologiya saytını işə salmışıq.
Baş direktor əlavə edib: “Biliyə əsaslanan məhsulların ixracı sahəsində də yaxşı tədbirlər görüldü və biz Suriyaya məhsul ixrac etdik, lakin ixrac lisenziyası Qida və Dərman Nazirliyi tərəfindən verildiyi üçün və onların prioriteti daxili ehtiyacları ödəmək olduğundan, biz daxili tələbatı ödəməyə diqqət yetiririk.”
Bir çox ölkələrin bu məhsulu almaq üçün növbəyə dayandığına işarə edən Kiyafər deyib: “Lisenziya verilsə, transplantasiya aid bir milyon dollarlıq dərmanı ixrac etmək imkanımız var.”
Sizin rəyiniz