Çin: İranın milli suverenliyini və ərazi bütövlüyünü dəstəkləyirik

İran İslam Respublikasının Xarici İşlər naziri vəzifəsini icra edən Əli Baqiri Rusiyanın Nijni Novqorod şəhərində keçirilən BRİKS xarici işlər nazirlərinin iclası çərçivəsində Çinin Xarici İşlər naziri Vanq Yi ilə görüşüb və müzakirə aparıb.

Əli Baqiri bu görüşün əvvəlində helikopter qəzasında şəhid olanlara görə Çinin yüksək vəzifəli rəsmilərinin təsəlliverici mesajları və rəğbət ifadələrini, xüsusilə də Çin hökumətinin xüsusi nümayəndəsinin şəhidlərin xatirəsinin anım mərasimində iştirakını yüksək qiymətləndirib.

Baqiri İran və Çin arasında əlaqələrin dərin köklərə malik olduğunu və bütün sahələrdə inkişaf yolunda olduğunu vurğulayıb, hazırkı şəraitdə müstəqil ölkələrin öz imkanları əsasında məsuliyyəti öz üzərinə götürə bildiyi və imkanlarına uyğun proporsional hüquqlara malik olduğu daha ədalətli dünya qurmağın vacibliyini vurğulayıb.

İranın yüksək səviyyəli diplomatı əlavə edib: “İran və Çinin rəhbərlik etdiyi çoxqütblülüyün qlobal problemləri və dilemmaları həll etmək üçün aydın və konkret həll yolları var. Halbuki, təkqütblülük dünyanı dalana dirəmişdir, üstəlik, öz problemlərini həll etmək iqtidarında deyil.”

Tehran və Pekin arasında ikitərəfli əlaqələrə toxunan Baqiri deyib: “Biz iki ölkə arasında əməkdaşlıq üfüqünü parlaq, irəliyə doğru və uğurlu kimi qiymətləndiririk.”

Bu görüşdə Çinin Xarici İşlər naziri Vanq Yi helikopter qəzasında şəhid olanlara bağlı bir daha başsağlığı verməklə yanaşı vurğulayıb: “İran bu yaxınlarda ciddi sınaqla üzləşdi. Çin dost ölkə kimi İran hökumətinin və xalqının yanındadır və İranın milli suverenliyini və ərazi bütövlüyünü dəstəkləyir.”