İran Prezidenti Məsud Pezeşkiyan bu gün axşam saatlarında Malayziyanın Xarici İşlər naziri Dato Sri Utama Haci bin Məhəmməd Haci Həsən ilə görüşündə İslam ölkələri, o cümlədən İran və Malayziya arasında yaxınlaşma və əlaqələrin gücləndirilməsini hazırkı dünya vəziyyətində vacib hesab edərək deyib: “İslam ölkələri arasında əlaqələrin inkişafı, yaxınlaşma və əməkdaşlığın artırılmasını vurğulamağımızın dini və etiqadi əsası var. Əgər bu gün sionist rejim regionda cinayət və təcavüzə cürət edirsə, bunun səbəbi müsəlmanların bir-birinə etinasız olmasıdır.”
Prezident İslam dünyasında məsul şəxslər və siyasətçilər arasında daha böyük sinerji və koordinasiyanı İslam cəmiyyətlərindən ixtilafların, anlaşılmazlıqların, yoxsulluğun və məhrumiyyətlərin aradan qaldırılmasında çox təsirli və vacib hesab edərək deyib: “İran İslam Respublikası İslam ölkələri, o cümlədən Malayziya ilə bütün sahələrdə əlaqələrin genişləndirilməsinə hazırdır və bunu vurğulayır.”
Prezident ümidvarlıq ifadə edib ki, bu görüşlər və müzakirələr iki ölkə arasında güclü və konstruktiv qarşılıqlı əlaqələrin qurulmasına və digər İslam ölkələri ilə paylaşılmasına səbəb olacaq.
Malayziyanın Xarici İşlər naziri Dato Sri Utama Haci də doktor Pezeşkiyanla görüşdən məmnunluğunu ifadə edib, Malayziyanın Kralı və Baş nazirinin səmimi salamlarını ölkəmizin Prezidentinə çatdırıb, İran-Malayziya münasibətlərini anlaşma və dostluq münasibətlərinə əsaslanan hesab edib, ölkəsinin xüsusilə elm və texnologiya, universitet əlaqələri, qida sənayesi və kənd təsərrüfatı sahələrində əlaqələri inkişaf etdirməkdə, İranın imkan və təcrübələrindən istifadə etməkdə maraqlı olduğunu vurğulayıb.
Malayziyanın Xarici İşlər naziri İranı bir neçə min illik tarixə malik, inkişaf edən sivil, tarixi bir ölkə kimi xarakterizə edərək deyib: “İran dünya səviyyəli alimlər, tədqiqatçılar və görkəmli elitalar diyarıdır. Malayziya bu elmi imkanlardan birgə əməkdaşlıq formasında, iki ölkənin və iki xalqın ümumi maraqlarına uyğun istifadə etməkdə maraqlıdır.”
Dato Sri Utama Haci İran və Malayziyanın Fələstin məsələsi də daxil olmaqla regional və beynəlxalq məsələlərdə ortaq mövqelərinə işarə edərək deyib: “İran İslam Respublikası kimi biz də sionist rejimin məzlum Qəzzə xalqına qarşı cinayət və soyqırımını pisləyirik, fələstinliləri öz evlərini və torpaqlarını tərk etməyə məcbur edəcək hər hansı planı və ya hərəkəti rədd edirik.”
Malayziyanın Xarici İşlər naziri həmçinin Malayziyanın Baş naziri Ənvər İbrahimin doktor Pezeşkiyanı bu ölkəyə səfərə rəsmi dəvət etməsi mesajını ölkəmizin Prezidentinə çatdırıb.
Sizin rəyiniz