Pezeşkiyan: Sionist rejim hansı səviyyədə İrana hücum edərsə, eyni səviyyədə cavab alacaq

Pezeşkiyan bu gün Türkiyə Prezidenti Rəcəb Tayyib Ərdoğanın telefon zənginə cavab olaraq bildirib ki, İranın ABŞ-la nüvə danışıqlarına qayıdışı yalnız regiondakı sionist rejimin təcavüzləri dayandırılsa mümkün ola bilər.
Prezident əlavə edib:“Biz hər zaman sülh istəmişik və buna görə də ABŞ-la nüvə danışıqlarında iştirak etdik, beynəlxalq qanunlara əsaslanan razılığa gəlmək istəyimizi göstərdik.”
Pezeşkiyan vurğulayıb ki, ABŞ-ın nüvə danışıqlarındakı nümayəndəsi Əraqçiyə demişdi ki, sionist rejim ABŞ-ın icazəsi olmadan hərəkət etməz, lakin danışıqlar başlamazdan əvvəl bu rejim İrana hücum edib və bu, ABŞ-ın hücum üçün icazə verdiyini göstərir.
İran Prezidenti həmçinin qeyd edib ki, sionist rejim mülki əhali, alimlər və hərbi şəxslərə qarşı cinayətlər törədir:“Müharibəni biz başlamadıq, lakin sionistlərin cinayətlərinə cavab verəcəyik. Hücum hər hansı səviyyədə olarsa, eyni səviyyədə cavab veriləcək. Müharibənin genişlənməsini istəmirik, lakin torpaqlarımıza olunan hücuma peşmanedici cavab verəcəyik.”
Türkiyə Prezidenti isə telefon danışığında ABŞ Prezidenti ilə apardığı söhbətlər barədə məlumat verərək bildirib:“İsrail əvvəlcə hücumlarını dayandırmalıdır, sonra isə İran və ABŞ nüvə danışıqlarına başlamalıdır. Türkiyə bu danışıqlara ev sahibliyi etməyə hazırdır.”