İRNA-nın turizm sahəsi üzrə müxbirinin verdiyi məlumata görə, Əli Əsgər Şalbafyan bazar ertəsi 25 sentyabrda İranda Ümumdünya Turizm Günü və Turizm Həftəsi münasibətilə keçirilən mətbuat konfransında deyib: “Keçən il İraqla viza rejiminin ləğvi edilməsi ilə bu ölkədən gələn turistlərin sayında ciddi artım oldu. İndi İran ən çox turist gələn ölkələr arasındadır. Təbii ki, Azərbaycan və Əfqanıstanda baş verən regional hadisələr bu bölgələrdən İrana gələn turistlərin sayını azaldıb. Bununla belə, cari ilin birinci yarısında İrana 3 milyon 354 mindən çox xarici turist səfər edib ki, bu da ötən illə müqayisədə 38%artım göstərir.”
O, Ümumdünya Turizm Gününün (Yaşıl Turizm və İnvestisiya) şüarına toxunaraq deyib: “Bu il ölkədə Turizm Həftəsi ilə eyni vaxtda ölkənin 60-dan çox şəhərində “yaşıl turizm” mövzusu ilə 130-dan çox turizm tədbiri keçiriləcək.”
Şalbafyan əlavə edib ki, 50-dən çox ekoturda yaşıl turizm yanaşmalı proqramlar, assosiasiya və təhsil müəssisələrinin əməkdaşlığı ilə 47 proqram, üç ixtisaslaşdırılmış dəyirmi masa və İsfahan turizm sərgisinin keçirilməsi bu həftənin tədbirləri sırasındadır.
Mədəni İrs Nazirinin turizm məsələləri üzrə nazirinin müavini deyib: “13-cü hökumətin ölkələrlə, xüsusən də qonşu dövlətlərlə əməkdaşlığı inkişaf etdirmək siyasətinə uyğun olaraq 68 ölkəyə vizaların ləğvi planını hökumətə təqdim etdik. Həmçinin səkkiz qurumun əməkdaşlığı ilə turistlərin şəxsi avtomobillərlə səyahətinin asanlaşdırılması ilə bağlı danışıqlar aparılıb və bu, turizm həftəsi çərçivəsində təqdim olunacaq. Bu tədbirlər xüsusilə qonşu ölkələrdən gələn turistlərin gediş-gəlişini asanlaşdırır.”
Çərşənbə günü rusiyalı turistlərin İrana qrup səfəri başlayır
Şalbafyan vizaların ləğvi ilə bağlı da deyib: “Rusiya üzrə qrup vizalarının ləğvi həyata keçirilib. Çərşənbə - 27 sentyabr - rusiyalı turistlərinin ilk qrupu İrana gələcək. Çinlə vizaların ləğvini də gündəmə gətirmişik. Çin hökuməti də İranı istiqamətlər siyahısında təsdiqləyib. Bu səbəbdən son bir ildə İrana gələn çinli turistlərin sayında yaxşı artım müşahidə etdik.”
O, xarici turistlərə filtrsiz SİM kartların verilməsi barədə açıqlama verərək deyib ki, xarici turistlərin bu SİM kartlardan istifadə etməsi Baş Prokurorluğun cinayət yönümlü nümunələrin ləğvi üzrə işçi qrupu tərəfindən təsdiqlənərək razılaşdırılıb. Mədəni İrs Nazirliyi, Rabitə Nazirliyi, Prokurorluq və polis qüvvələri arasında tələb etdiyimiz prioritetlərə uyğun olaraq bunun necə həyata keçiriləcəyi ilə bağlı keçirilən görüşdə biz bu planda turizm fəallarının prioritetləşdirilməsini xahiş etdik. Bu imkanı təmin etmək üçün səyahət xidməti ofislərinin siyahısını təqdim etmək nəzərdə tutuldu.
Misir Hava Şirkətinin rəhbərləri gələn həftə İrana gələcək
İRNA müxbirinin Misirlə turizm əlaqələrinin başlanması ilə bağlı sualına cavab verən Şalbafyan deyib: “Misirlə turizm əlaqələrimiz xarici siyasət çərçivəsindədir. Ötən həftə Misir hava yollarının bir qrup rəhbərinin İrana səfər etməsi ilə bağlı Mədəni İrs Nazirliyi ilə məktublaşma həyata keçirildi. Hazırda İran və Misir arasında birbaşa aviareys yoxdur. Misirə birbaşa uçuşun həyata keçirilməsinə cavabdeh Mülki Aviasiya Təşkilatdır.”
Nazir müavini Misir turizm turları haqda deyib: “Turizm sahəsinin özəl sektoru bir sıra danışıqlar həyata keçirib, amma son nəticədə turizm əlaqələri ölkənin xarici siyasətinə tabedir. Birincisi, biz iranlı turistlərin ləyaqətinin qorunmasını təmin etməliyik. Bu sahədə fəaliyyət göstərmək istəyən səyahət xidməti ofisləri bu məsələyə diqqət yetirməlidir.”
O, qeyd edib ki, “Misir turu” birbaşa uçuşumuz mövcud olduğu halda məna tapır. Bu ana qədər bildiyimizə görə, birbaşa uçuşumuz yoxdur. Uçuşla bağlı ən son xəbərləri Aviasiya Təşkilatı elan etməlidir. Özəl sektorun isə birbaşa uçuş təşkil etməsi lazım deyil.
Sizin rəyiniz