Livan Hizbullah Hərəkatının Baş katibi Şeyx Nəim Qasim bugünkü çıxışında Livanın cənubunda baş verən son hadisələri və İslam ümmətinin şəhidlərinin lideri, hərəkatın keçmiş Baş katibi Seyid Həsən Nəsrullahın cənazəsi ilə vida mərasiminin vaxtını açıqlayıb.
O deyib: “Əl-Qəssam Briqadalarının baş komandiri Məhəmməd Deyf və onun müavini Mərvan İsanın şəhadəti ilə bağlı Fələstin xalqını təbrik edir və eyni münasibətlə başsağlığı veririk, həmçinin fələstinli əsirlərin azad edilməsi və bu xalqın nailiyyətləri münasibətilə Fələstin xalqını təbrik edirik.”
Şeyx Nəim Qasim bildirib: “Livan hökuməti atəşkəs razılaşmasının uzadılmasından sonra İsrailin təcavüzünü və öhdəliklərinin pozulmasını dayandırmaq üçün müşahidəçi ölkələrə güclü və qəti təzyiqləri izləmək və tətbiq etməklə bağlı məsuliyyət daşıyır. Bu, təkcə öhdəliyin pozulması deyil, həm də ilkin təcavüzlərdir. Livan hökuməti bununla qəti şəkildə məşğul olmalıdır. Livan hökuməti atəşkəs razılaşmasını yerinə yetirmək üçün üzərinə düşən məsuliyyəti yerinə yetirənə qədər İsrailin təcavüzü qarşısında dözümlə dayandıq. İsrail razılaşmanı pozur və heç nəyə əhəmiyyət vermir. Müqavimət bizim yolumuz və seçimimizdir. Müvafiq vaxtda öz qiymətləndirməmizə əsasən hərəkət edəcəyik.”
Şeyx Nəim Qasim deyib: “ABŞ, İsrail və bəzi ölkələrin başçılıq etdiyi, məğlubiyyətə rəvac verən daxili qrupla birləşmiş əks-hücum (bizə qarşı) var. Söhbət mütləq qələbədən getmir. Bu, qələbə və məğlubiyyətin olduğu bir döyüşdür. Xalqımız bilir ki, bəzi hallarda qalib olub, bəzi hallarda isə məğlubiyyətlə üzləşib. Biz İsrailin hücumu qarşısında duruş gətirən və onu sındıra bilən, düşmənin müqaviməti məhv edə bilməyəcəyi bir qələbədən söhbət edirik.”
Hizbullah lideri vurğulayıb: “Şəhid Seyid Həsən Nəsrullah və şəhid Seyid Haşim Səfiyəddinin cənazələri ilə vida mərasimi fevralın 23-ü bazar günü “Biz vədimizə sadiqik” şüarı ilə keçiriləcək.
Sizin rəyiniz